inkuru zigezweho
   

Abaserukiye Cameroun mu mikino ya ‘Commonwealth’ baburiwe irengero


yasuwe inshuro:2


Abaserukiye Cameroun mu mikino ya ‘Commonwealth’ baburiwe irengero


Abakinnyi batanu mu bari baserukiye Cameroun mu mikino ihuza ibihugu bikoresha ururimi rw’icyongereza ‘Commonwealth Games’ iri kubera muri Australia, baburiwe irengero bamwe bataranakina.

Nk’uko BBC yabitangarijwe n’ushinzwe itangazamakuru mu itsinda ryaserukiye Cameroun muri iyi mikino, Simon Molombe, abakinnyi baburiwe irengero ni batanu barimo batatu baterura ibiremereye na babiri bakina iteramakofe.

Yavuze ko mu bagiye harimo n’abatari barushanwa mu mikino bitabiriye, bakaba barabuze mu bihe bitandukanye kuko bamwe baragaye bwa nyuma aho bacumbikiwe kuwa Mbere abandi babura kuri uyu wa Kabiri.

Molombe yagize ati “Abayobozi bababaye cyane kubera abakinnyi baburiwe irengero, bamwe bari bataranakina. Hari icyizere ko bashobora kugaruka bakazanasubirana n’abandi mu rugo ariko ni gike.”

Aba bakinnyi bari bafite ibyangombwa bibemerera kuba muri Australia kugera tariki 15 Gicurasi, leta y’iki gihugu ikaba yarihanangirije abitabiriye imikino ya Commonwealth ko uzagerageza kuhaguma nyuma y’iyo tariki azakurikiranwa bikomeye.

Muri iyi mikino harimo n’abakinnyi bagiye bahagarariye u Rwanda ariko mbere yo guhaguruka i Kigali, mu butumwa bwihariye bahawe na Minisitiri wa Siporo n’Umuco, Uwacu Julienne bwibanze cyane ku bijyanye no gutoroka ababwira ko ari ubugwari budakwiye Umunyarwanda.

Si ubwa mbere abakinnyi baserukiye Cameroun bajya mu mikino ya Commonwealth bagatoroka kuko no mu 2012 mu yabereye i Londres mu Bwongereza barindwi batasubiye iwabo.

ibitekerezo

tanga igitekerezo cyawe