inkuru zigezweho
   

Minisitiri Kaboneka yasabye abanyamakuru b’ubu kwitondera ibyo batangaza


yasuwe inshuro:52


Minisitiri Kaboneka yasabye abanyamakuru b’ubu kwitondera ibyo batangaza


Minisitiri w’Ubutegetsi bw’Igihugu, Francis Kaboneka, yasabye abanyamakuru kujya bitondera ibyo bandika n’ibyo bavuga birinda kumera nka bamwe mu babayeho mbere ya Jenoside batangaje ibyatumye Abatutsi basaga miliyoni bicwa mu mezi atatu gusa.

Jenoside yakorewe Abatutsi imaze imyaka 24 ikozwe. Kimwe mu bivugwa biza ku isonga mu byatumye yihuta ndetse ikica abantu benshi mu gihe gito, ni uko hifashishijwe itangazamakuru, ubutumwa bwo kwica bukagera kuri benshi icyarimwe.

Bimwe mu binyamakuru bishyirwa mu majwi ni ikinyamakuru Kangura, Kinyamateka, Radiyo Rwanda na Radiyo RTLM byakoreshejwe mu kubiba urwango mu Banyarwanda.

JPEG - taille ko
Minisitiri w’Ubutegetsi bw’Igihugu, Francis Kaboneka

Ubwo hibukwaga abari abanyamakuru n’abakozi bakoreraga Ikigo cy’Igihugu cy’Itangazamakuru (ORINFOR) kuri uyu wa 12 Mata 2018, Minisitiri Kaboneka yasabye abanyamakuru bariho ubu kureba kure mbere y’uko bagira ibyo batangaza.

Yagize ati “Iyo mwandika, iyo muvuga amakuru burya hari abo muba muyoboye mu mitekerereze no mu mikorere. Ibyo tuvuga, ibyo twandika, dukwiriye kubikora tunatekereza ngo ni izihe ngaruka cyangwa ni akahe kamaro bifitiye abari bubibone, abari bubisome, abari bubyumve, ni iki bari bukuremo, tukabitekereza mbere y’uko tubishyira hanze.”

Kaboneka yavuze uko kwisuzuma mbere yo gutangaza ikintu ari ukugira ngo habeho kwirinda ko bazagwa mu mutego wo kugurisha umutima nama nk’uko byagenze ku banyamakuru ba mbere ya Jenoside.

Umuyobozi Mukuru w’Ikigo cy’Igihugu cy’Itangazamakuru, RBA, Arthur Asiimwe, yavuze ko ibyabaye bikwiriye kubera urugero abanyamakuru bariho ubu.

Yagize ati “Uyu ni umwanya wo gusubiza amaso inyuma ngo twinenge, twishakemo ingufu n’imbaraga zo kugira ngo dutange umusanzu wacu nk’itangazamakuru wo kubaka igihugu cyacu. Nitwe tugomba gufata iya mbere dushingiye ku kuba ari twe twafashe iya mbere mu gusenya iki gihugu.”

Kugeza ubu hibukwa abanyamakuru 60 bazize Jenoside yakorewe Abatutsi ariko ubushakashatsi buracyakomeje ngo hamenyekane n’abandi.

ibitekerezo

tanga igitekerezo cyawe