inkuru zigezweho
   

Minisitiri w’Intebe asanga abaganga bagomba kubahwa bagahabwa agaciro bakwiye

yanditswe na:Gilbert MAHAME kuwa:2017-04-05 06:28:41

yasuwe inshuro:15


Minisitiri w’Intebe asanga abaganga bagomba kubahwa bagahabwa agaciro bakwiye


Minisitiri w’intebe Anastase Murekezi yabwiye intumwa za rubanda ko urwego rw’ ubuzima mu Rwanda rumaze kugera ku bikorwa by’indashyikirwa ndetse binahesha ishema igihugu mu ruhando mpuzamahanga, ariko agaruka ku kibazo cy’abaganga barararikira amavuriro yigenga kimwe n’abishyurirwa kwiga hanze bagahitamo kwigumirayo, aho yabwiye abagize inteko ishingamategeko ko ipfundo ry’iki kibazo badakwiye kurirebera ku mishahara abaganga bahembwa gusa, ahubwo bagomba no kurebera ku gaciro n’icyubahiro bahabwa iy bari mu kazi kabo ndetse no muri sosete muri rusange.

JPEG - taille ko
Minisitiri w’intebe Anastase Murekezi ngo abaganga bakwiye guhabwa agaciro bagomba

Ubwo abagize inteko ishingamategeko imitwe yombi bagaragazaga ikibazo cy’abaganga bava mu mavuriro ya Leta bakajya ahandi, Minisitiri w’intebe Anastase Murekezi, yababwiye ko ikibazo gikwiye kureberwa ku gaciro abaganga bahabwa muri sosete n’iyo bari mu kazi. Aha yavuze ko abaganga bakwiye kubahwa kuko aria bantu bakomeye.

Yagize ati: "Ntabwo iki kibazo twakirebera gusa mu kongera umushahara bagenerwa ahubwo wanareba uko bahabwa agaciro muri sosiyete. Ni abantu bakomeye tugomba kububaha kugira ngo nabo bumve ko ari ab’ingenzi cyane."

Minisitiri w’Intebe, Anastase Murekezi yatangaje ko kubona abaganga bava mu bitaro bajya mu bindi imbere mu gihugu nta kibazo bwikwiye guteza.

Yagize ati: "Iyo abaganga bavuye mu bitaro bya leta bakajya ahandi mu Rwanda nta kibazo kuko bashobora no gutumirwa bakajya gutanga serivisi. Abajya hanze nibo bateje ikibazo. Twabaha nk’urugero, mu baganga b’inzobere bafashijwe kwiga na Leta mu myaka itanu ishize, abaganga 35 kuri 218 bagiye hanze twaba duhombye kuko kwigisha umuganga biragora. Abakozi bo mu rwego rw’ubuzima ntibahagije ndetse n’abahari bakeneye guhora bongererwa ubushobozi."

Ibura ry’abaganga b’inzobere ni ikibazo abagize Inteko Ishinga Amategeko bavuga ko bahuye nacyo mu ngendo bagiriye mu bigo nderabuzima n’ibitaro bya Leta. Zimwe mu mpamvu zagarutsweho zigitera ahanini zishingiye ku mushahara bahabwa, amasezerano abagenga n’amasaha y’ikirenga bakora badahemberwa.

Hakozwe inyigo yuko abaganga mu bitaro bya leta bakemererwa kuvura ku giti cyabo, abarwayi baturutse mu bigo bya leta, amafaranga avuyemo akongerwa ku mishahara yabo.

Guverinoma yashyize imbaraga muri gahunda yo kwigisha abaganga b’inzobere mu Rwanda, aho muri uyu mwaka abagera kuri 70 bari kwiyungura ubumenyi.

Minisiteri y’Ubuzima kandi iteganya gushiraho koperative yo kubitsa no kuguriza (SACCO) y’abaganga izajya ibafasha kwiteza imbere no kwita ku mibereho yabo.

Nubwo ku rwego rw’igihugu hari ibitaro by’icyitegererezo indwi birimo King Faisal, Kanombe Hospital, CHUK, CHUB, Ruhengeri, Kibungo na Kibuye; umubare w’ababikoramo uracyari hasi. Mu Rwanda hari abaganga 1089, inzobere 303, abaforomo 10795, ababyaza 752 n’abatekinisiye ba Laboratwari 1543.

Gilbert Mahame

ibitekerezo

tanga igitekerezo cyawe