inkuru zigezweho
   

Misiri: Sisi yongeye gutorerwa kuba Perezida mu matora yahanganyemo n’umushyigikiye


yasuwe inshuro:237


Misiri: Sisi yongeye gutorerwa kuba Perezida mu matora yahanganyemo n’umushyigikiye


Abdel Fattah el Sisi yongeye gutorerwa kuyobora Misiri mu gihe cy’imyaka ine iri imbere mu matora yafashwe nk’aho nta muntu ugaragara bari bahataniye uyu mwanya.

Sisi yagize amajwi 97% nkuko byatangajwe na Komisiyo y’Amatora kuri uyu wa Mbere.

Ntibyatunguranye kuko yari ahanganye na Mousa Mostafa Mousa utazwi cyane mu ruhando rwa politiki y’icyo gihugu ndetse ishyaka rye mu matora yabanje ryari ryashyigikiye Sisi.

Abanyapolitiki bakomeye bagombaga kuba abakandida bamwe batewe ubwoba abandi barafungwa nkuko Aljazeera yabitangaje.

Komisiyo y’Amatora yavuze ko ubwitabire bwari kuri 41.5 % ugeraranyije na 47 % mu matora yo mu 2014.

Reuters yatangaje ko hari bamwe mu bagiye gutora bavuze ko babanje guhabwa ibiryo ndetse n’amafaranga kugira ngo bemere kujyayo. Leta yabihakanye ivuga ko niba byaranakozwe bitari mu izina ryayo.

Amajwi y’agateganyo yatangajwe ku wa Kane w’icyumweru gishize yagaragaje ko Mousa yabonye amajwi 3 %. Ikinyamakuru The Economist cyatangaje ko Mousa yaje ku mwanya wa gatatu nyuma y’aho abasaga miliyoni batoreye imfabusa.

Hari abagiye gutora aho guhitamo mu bakandida bari bahari ngo bakandika izina ry’umukinnyi w’icyamamare wa Liverpool ukomoka mu Misiri, Mohamed Salah.

Perezida wa Leta Zunze Ubumwe za Amerika, Donald Trump, yashimiye Sisi ku ntsinzi yabonye, anamwizeza imikoranire myiza hagati y’ibihugu byombi.

Sisi w’imyaka 63 yatorewe kuyobora Misiri bwa mbere mu mwaka wa 2014, nyuma y’igihe gito ahiritse ku butegetsi Mohamed Morsi.

Umwarimu w’amateka muri Kaminuza ya California, James Gelvin, yavuze ko icyo Sisi akwiye gushyira imbere muri iyi manda ari ukuzahura ubukungu bwa Misiri no gukura abaturage benshi mu bukene bukabije.

ibitekerezo

tanga igitekerezo cyawe