inkuru zigezweho
   

RDC: Imiryango itegamiye kuri Leta yabujijwe kwakira inkunga ivuye mu Bubiligi


yasuwe inshuro:0


RDC: Imiryango itegamiye kuri Leta yabujijwe kwakira inkunga ivuye mu Bubiligi


Repubulika Iharanira Demokarasi ya Congo yanze kwitabira inama y’abaterankunga bafasha imiryango ishinzwe ubutabazi muri icyo gihugu, iteganyijwe kubera i Genève kuri uyu wa Gatanu tariki 13 Mata 2018.

Iyi nama igamije gushakisha inkunga yo gufasha ibikorwa byo kurengera abababaye muri icyo Congo.

Minisitiri w’Ububanyi n’Amahanga, Léonard She Okitundu, yavuze ko imiryango itegamiye kuri Leta izemera kwakira ayo mafaranga izahita ihagarikwa gukorera muri icyo gihugu.

Congo yanze kwitabira iyo nama ivuga ko itigeze igira uruhare mu itegurwa ryayo. Yanamaganye inkunga ya miliyoni 11.6 z’amadolari yatanzwe n’u Bubiligi nk’uruhare rwabwo mu gushakisha inkunga ya miliyoni 18 z’amadolari zimaze gutangwa.

JPEG - taille ko
Minisitiri Okitundu

Iyi nama y’i Genève biteganyijwe ko ikusanyirizwamo amafaranga agera kuri miliyari 1.68 y’amadolari.

Okitundu yavuze ko nta nkunga y’u Bubiligi bashaka kwakira kuko icyo gihugu kiyemeje gucana umubano na Congo.

Ati “U Bubiligi bwiyemeje gucana umubano natwe, icyo tugomba kugikurikiza ariko nta rwango dufitiye abaturage b’u Bubiligi bafitiye umutima w’urukundo abaturage ba Congo.”

Imiryango mpuzamahanga irimo uwita ku mpunzi (HCR), ushinzwe ibiribwa (PAM) ndetse n’ushinzwe ibiribwa n’ubuhinzi (FAO) yagaragaje ko itewe impungenge n’icyemezo cya Guverinoma ya Congo.

Mu gihe inama iraba kuri uyu wa Gatanu, bimwe mu bihugu nterankunga byamaze gutanga 12.6 % by’amafaranga akenewe. U Bubiligi buri mu bihugu 10 bya mbere bimaze gutanga menshi.

Umwe mu bateguye iyi nama yabwiye Jeun Afrique dukesha iyi nkuru ko abaterankunga badakwiriye kugurana ububabare bw’abaturage ba Congo kubera inyungu za politiki.

Umubano wa Congo n’u Bubiligi watangiye kuzamba mu ntangiriro z’uyu mwaka, ubwo u Bubiligi bwahagarikaga imishinga imwe n’imwe bwateragamo inkunga Leta ya Congo buvuga ko ari ku mpamvu z’umutekano.

Miliyoni 25 z’amayero u Bubiligi bwashoraga muri iyo mishinga, bwayahaye imiryango itegamiye kuri Leta ishinzwe ubutabazi muri Congo.

Byarakaje cyane Leta ya Congo ihitamo gufunga bimwe mu biro by’abagaharariye u Bubiligi i Lubumbashi ndetse n’ibiro bimwe by’abahagarariye Congo mu Mujyi wa Antwerp mu Bubiligi. Congo kandi yahise igabanya ingendo Sosiyete ya Brussels Airlines yakoreraga muri icyo gihugu.

ibitekerezo

tanga igitekerezo cyawe