inkuru zigezweho
   

USA: Polisi yatangaje imyirondoro y’uwagabye igitero ku cyicaro cya Youtube


yasuwe inshuro:1


USA: Polisi yatangaje imyirondoro y’uwagabye igitero ku cyicaro cya Youtube


Polisi yo mu Majyaruguru ya California yatangaje amazina y’umugore warashe abantu batatu bagakomereka ku cyicaro cya Youtube ndetse nawe akiyambura ubuzima.

Umuyobozi wa Polisi ya San Bruno, Ed Barberini yatangarije CNN ko uwitwa Nasim Aghdam ariwe wagabye iki gitero, ndetse akaba yasanzwe aho byabereye bigaragara ko yirashe. Uretse batatu yarashe, harimo n’undi umwe wakomeretse ubwo abantu babyiganaga bahunga.

Barberini yakomeje avuga ko impamvu zateye uyu mugore gukora iki gikorwa cy’ubugizi bwa nabi itaramenyekana, ariko bakeka ko umwe mubo yarashe ari umukunzi we.

Hari n’andi makuru avuga ko uyu mugore yagiye agaragaza kenshi ko Youtube idatanga uburenganzira bungana, ashinja uru rubuga ko rutuma abantu batareba amashusho yerekeranye n’uburenganzira bw’inyamaswa, indyo zitarimo inyama n’ibindi.

Umwe mu batangabuhamya bari hafi y’aho iki gikorwa cy’ubugizi bwa nabi cyabereye yavuze ko amasasu agitangira babanje kutemera ko aribyo, ariko nyuma baza kubona ko bishobora kuba bikomeye batangira kubyigana basohoka.

Abinyujije ku rubuga rwe rwa Twitter, Perezida Donald Trump yihanganishije abakozweho n’iki gitero, ndetse ashima polisi yihutiye gutabara.

Senateri Dianne Feinstein uza mu ba mbere bifuza ko hajyaho amategeko akarishye arebana no gutunga imbunda, we yavuze ko kongera kumva igikorwa nk’iki cy’ubwicanyi bimubabaje cyane, ndetse ari gusengera abakozi ba Youtube ngo Imana ikomeze kubarinda.

Youtube yashinzwe mu 2005, iza kugurwa na Google mu 2006 kuri miliyari 1.65 z’amadolari, n’imwe mu mbuga za internet zizwi cyane, aho ishyirwaho amashusho n’amajwi n’abantu batandukanye.

Icyicaro cyayo giherereye mu Mujyi wa San Bruno muri Leta ya California gikoreramo abakozi basaga 1100. Inzego zitandukanye zirimo n’Ibiro bya Amerika bishinzwe iperereza, FBI zatangiye gufatanya mu iperereza ku mpamvu zaba zatumye uriya mugore agaba iki gitero ndetse nawe akiyambura ubuzima.

ibitekerezo

tanga igitekerezo cyawe