inkuru zigezweho
   

Zari yatangiye gushinja Diamond kwirengagiza abana babyaranye


yasuwe inshuro:3


Zari yatangiye gushinja Diamond kwirengagiza abana babyaranye


Zari Hassan yibasiye Diamond bahoze babana amushinja kwirengagiza inshingano ze nka se w’abana babyaranye avuga ko adaheruka kubikoza na bo bakaba baramaze kumwikuramo no kumwibagirwa.

Urukundo rwa Zari na Diamond rwashyizweho akadomo ku wa 14 Gashyantare 2018 ku munsi wahariwe abakundana [Saint Valentin]. Icyo gihe, Zari yavuze ko yasize Diamond ku bwo kunanirwa kwihanganira ibibazo no gucibwa inyuma. Batandukanye bamaze kubyarana kabiri.

Nyuma y’itandukana ry’aba bombi, umugore yirinze kugira byinshi avuga ku mubano wabo, mu biganiro byose yagiye atumirwamo ntiyigeze avuga nabi Diamond. Uyu muhanzi we mu minsi ishize yatangaje ko yari yarabanje kuburira Zari mbere y’uko bakundana akamuteguza kuzamubona kenshi abagore bamuriho bitewe n’akazi akora.

Zari abinyujije ku rubuga rwa Snapchat yibasiye Diamond ku nshuro ya mbere kuva batandukana. Mu magambo yuzuye uburakari yibasiye uyu muhanzi avuga ko yananiwe kubaha inshingano afite zo kuba ari umubyeyi w’abana babiri babyaranye ndetse ashimangira ko bamaze kumwibagirwa nka se.

Yagize ati “Abajyanama b’abahanzi bakwiye kujya babanza kubagiraho icyizere gisesuye mbere y’uko bashyira ibipfuye ku mugaragaro [...] Ni ryari uheruka kubona abana bawe? Ndakeka ko bamaze kwibagirwa ibyawe byose.”

Yakomeje amubwira kujya abanza ‘gutekereza mbere y’amagambo aherekeza ifoto’ akoresha asoza akoresheje imvugo isobanura “utagira ubwenge” n’iyo kwimyoza.

Ku rundi ruhande, Diamond ntaragira icyo avuga ku byavuze na Zari bahoze babana. Yahise akomeza ibikorwa bye bya muzika n’indirimbo nshya afite yise
“Kwangwaru” yakoranye na Harmonize uheruka mu Rwanda, yasohoye uruhererekane rw’amashusho ku rubuga rwa Instagram yishimishanya n’abakobwa bifashishije mu ikorwa ryayo.

Zari na Diamond babyaranye abana babiri, uwa mbere bamwise Latiffah Naseeb [Dangote] yavutse ku wa 6 Kanama 2015, yakurikiwe n’umuhungu bise Prince Nillan Dangote wavutse ku wa 6 Ukuboza 2016. Aba ku mugore biyongera ku bandi batatu yabyaranye na nyakwigendera Ivan Semwanga barimo Pinto, Quincy n’uwitwa Didy.

Mu mibanire y’aba bombi bagiye bashyirwa mu itangazamakuru havugwa urunturuntu mu rugo rwabo no gucana inyuma bya hato na hato cyane cyane Diamond byanarangiye abyaranye umwana wa gatatu n’umunyamideli witwa Hamisa Mobeto akamwemera hashize igihe yaramwihakanye avuga ko atari uwe.

ibitekerezo

tanga igitekerezo cyawe